देवणी | प्रतिनिधी —
सध्या पार पडलेल्या जिल्हा परिषद निवडणुकीत बोरोळ जिल्हा परिषद गटातून काँग्रेसचे उमेदवार औदुंबर पांचाळ विजयी झाले आहेत. देवणी तालुक्यातील तीन जिल्हा परिषद जागांपैकी एक जागा काँग्रेसला मिळाल्याने राजकीयदृष्ट्या या निकालाकडे महत्त्वपूर्ण घडामोड म्हणून पाहिले जात आहे. या निकालामागे काँग्रेसचे तालुकास्तरावरील संयोजक रतन पाटील नागराळकर यांनी केलेला नियोजनबद्ध प्रचार, संघटनात्मक बांधणी आणि सातत्यपूर्ण संपर्क हे महत्त्वाचे घटक ठरल्याचे पक्षांतर्गत सांगितले जात आहे. प्रचाराच्या सुरुवातीपासून शेवटच्या टप्प्यापर्यंत रतन पाटील नागराळकर यांनी गटातील प्रत्येक गाव, वाडी-वस्ती येथे प्रत्यक्ष उपस्थित राहून कार्यकर्त्यांना सक्रिय ठेवले.रतन पाटील नागराळकर हे उदगीर पंचायत समितीचे पहिले सभापती स्व. मलशेट्टी आप्पा पाटील नागराळकर यांचे नातू असून माजी जिल्हा परिषद सदस्य दिलीप पाटील नागराळकर यांचे पुतणे आहेत. सार्वजनिक जीवनाची पार्श्वभूमी असली, तरी या निवडणुकीत त्यांनी वैयक्तिक श्रेयापेक्षा संघटन मजबूत करण्यावर भर दिला.काँग्रेस पक्षाने बोरोळ गटात सामान्य, शिक्षित आणि लोकांमध्ये सतत वावरणाऱ्या उमेदवाराला संधी देण्याचा निर्णय घेतला, त्याचा सकारात्मक परिणाम मतदारांमध्ये दिसून आला.
औदुंबर पांचाळ यांनी प्रचारादरम्यान विकास, स्वच्छता, शिक्षण, मूलभूत सुविधा आणि गोरगरिबांचे प्रश्न या मुद्द्यांवर भर दिला होता.स्व. विलासराव देशमुख यांच्या विकासविचारांचा वारसा, माजी मंत्री अमित विलासराव देशमुख आणि युवा नेते धीरज देशमुख यांच्या नेतृत्वाखाली काँग्रेस पक्षाने ग्रामीण भागात संघटन मजबूत करण्याचा प्रयत्न केला. त्याला बोरोळ गटातील निकालातून काही अंशी यश मिळाल्याचे पक्षातील नेते मानतात.प्रचार व्यवस्थापनाबाबत बोलताना काँग्रेस कार्यकर्त्यांमध्ये एकमताने सांगितले जात आहे की, “रतन पाटील नागराळकर यांनी प्रचारात सातत्य, संयम आणि शिस्त ठेवली.” प्रचारात आक्रमकतेपेक्षा मतदारांशी थेट संवाद, बैठका आणि कार्यकर्त्यांची मोट बांधण्यावर भर देण्यात आला.बोरोळ जिल्हा परिषद गटातील या निकालामुळे देवणी तालुक्यातील राजकीय समीकरणांमध्ये बदल झाल्याची चर्चा सुरू आहे. काँग्रेससाठी हा विजय केवळ एक जागा मिळवण्यापुरता मर्यादित नसून, भविष्यातील संघटनात्मक कामासाठी आधारभूत ठरणारा निकाल असल्याचे मानले जात आहे.
या निकालानंतर काँग्रेस पक्ष, विजयी उमेदवार औदुंबर पांचाळ आणि प्रचार यंत्रणेच्या वतीने बोरोळ जिल्हा परिषद गटातील सर्व मतदारांचे आभार मानण्यात आले आहेत. मतदारांनी दाखवलेला विश्वास आणि पाठिंबा हा जबाबदारी वाढवणारा असून, विकास, पारदर्शकता आणि सर्वसामान्यांच्या प्रश्नांना प्राधान्य देत काम करण्याचा निर्धार यावेळी व्यक्त करण्यात आला आहे.
*दयानंद कांबळे नागराळकर*
7887827886
टिप्पण्या
टिप्पणी पोस्ट करा