---------------------------------------
उदगीर / प्रतिनिधी : तालुक्यातील शेकापूर येथील पेंटर, चित्रकार श्री. व्यंकटराव पांचाळ यांचा पुणे जिल्ह्यातील अनेक ठिकाणच्या जिल्हा परिषद शाळेवर सत्कार करण्यात आला. मुंबईच्या एका संस्थेच्या वतीने शाळा रंगरंगोटी व प्रासंगिक, समर्पक चित्र रेखाटल्याबद्दल उत्कृष्ट अशा शाळांकडून त्यांचा सन्मान करण्यात आला.
माणूस कुठे जन्मावा हे त्याच्या हातात जरी नसले तरी तो आपल्या कर्तृत्वावर सर्वदूर पोहचू शकतो याचे उत्तम उदाहरण म्हणजे शेकापूर येथील पेंटर व्यंकटराव पांचाळ. गेल्या काही दशकापासून उदगीर, लातूर जिल्हा व जवळपास मराठवाड्यातील अनेक जिल्हा परिषद शाळांच्या आपल्या कुंचल्यातून त्यांनी भिंती बोलक्या केल्या. उदगीर येथील अनेक शाळा व नगर परिषदेच्या वतीने त्यांनी रंगरंगोटी व चित्र रेखाटले. सांगली, सातारा, पुणे, कोल्हापूर, बुलढाणा अशा अनेक ठिकाणच्या जिल्हा परिषद शाळा रंगवण्याचे त्यांनी काम केले. हे करीत असतानाच त्यांनी मुंबई येथील जग्गवार लॅन्ड रोव्हर इंडिया लि. मुंबई माता बाल संगोपन या संस्थेकडून सोमनाथ आर्टस् सासवडच्या वतीने पुणे जिल्ह्यातील आदिवासी भागातील शाळा सजावटचे काम हाती घेण्यात आले.अनेक शाळा रंगरंगोटी व चित्र काढण्याचे काम पूर्ण केले असून त्यांच्या उत्कृष्ट कामाबद्दल श्री. व्यंकटराव पांचाळ यांचा जिल्हा परिषद प्राथमिक शाळा माळेगाव ता. खेड जि. पुणे, जिल्हा परिषद प्राथमिक शाळा रामनगर ( राणमळा ) ता. खेड जि. पुणे, जिल्हा परिषद प्राथमिक शाळा जांभूळदरा ता. खेड जि. पुणे या शाळा उत्कृष्ट रंगवणे, समर्पक चित्र काढणे याबद्दल त्यांचा त्या त्या शाळाच्या वतीने मान्यवरांच्या हस्ते सन्मान करण्यात आला. श्री. व्यंकटराव पांचाळ यांनी अनेक साहित्यिकांच्या पुस्तकाला मुखपृष्ठ रेखाटले, पुस्तकांच्या आतील चित्र रेखाटले, त्यांच्या त्या पुस्तकांना अनेक पुरस्कारही मिळाले. श्री. व्यंकटराव पांचाळ यांच्या या यशाबद्दल त्यांचे सर्वत्र कौतुक होतं आहे.
टिप्पण्या
टिप्पणी पोस्ट करा