उदगीर : नाईक चौक, देगलूर रोड येथील ए-मार्टच्या शेजारी स्थित महात्मा पब्लिक स्कूलने यशस्वी शैक्षणिक वाटचालीची नऊ वर्षे पूर्ण करून आता दहाव्या वर्षात पदार्पण केले आहे. गुणवत्तापूर्ण शिक्षण, संस्कारमूल्ये आणि विद्यार्थ्यांच्या सर्वांगीण विकासाला प्राधान्य देत शाळेने अल्पावधीतच पालकांचा विश्वास संपादन केला आहे.
सन २०१७ मध्ये स्वामी विवेकानंद ग्रामसेवा प्रतिष्ठान, उदगीर अंतर्गत संचालक दीपक पाटील नेत्रगावे व सौ. संगीता नेत्रगावे यांनी महात्मा पब्लिक स्कूलची स्थापना केली. सुरुवातीला प्ले ग्रुप, नर्सरी, एलकेजी व यूकेजीच्या अवघ्या ३० विद्यार्थ्यांसह आणि सहा शिक्षकांच्या सहकार्याने सुरू झालेली ही शाळा आज ११० विद्यार्थ्यांपर्यंत पोहोचली असून सात शिक्षक विद्यार्थ्यांना ज्ञानदानाचे कार्य करीत आहेत.
शाळेत विद्यार्थ्यांना दर्जेदार शिक्षणासोबतच शिस्त, संस्कार, आत्मविश्वास आणि स्पर्धात्मकतेचे धडे दिले जातात. लहान वयापासून विद्यार्थ्यांमध्ये बौद्धिक विकास घडावा यासाठी विविध उपक्रम राबविले जातात. नियमित अभ्यासक्रमासोबतच विविध स्पर्धा परीक्षा, सांस्कृतिक कार्यक्रम आणि शैक्षणिक उपक्रमांमध्ये विद्यार्थ्यांना सहभागी करून घेतले जाते.
शिवजयंती, डॉ. बाबासाहेब आंबेडकर जयंती, महात्मा फुले, सावित्रीबाई फुले, महात्मा गांधी, पंडित नेहरू यांसह विविध महापुरुषांच्या जयंती व पुण्यतिथीचे आयोजन करून विद्यार्थ्यांना त्यांच्या कार्याची ओळख करून दिली जाते. तसेच वाचन प्रेरणा दिवस, गुरुपौर्णिमा, शिक्षक दिन, गोकुळाष्टमी, मकरसंक्रांत, गुढीपाडवा, दसरा, रमजान ईद, धुळवड, १ मे, १५ ऑगस्ट, २६ जानेवारी आणि १७ सप्टेंबर यांसारखे विविध दिनविशेष उत्साहात साजरे केले जातात.
शाळेच्या वार्षिक स्नेहसंमेलनात नृत्य, गायन, वक्तृत्व, नाटिका यांसारख्या कार्यक्रमांद्वारे विद्यार्थ्यांच्या कलागुणांना वाव दिला जातो. प्रत्येक विद्यार्थ्याचा वाढदिवस साजरा केला जातो. तसेच विविध क्रीडा स्पर्धांचे आयोजन करून विद्यार्थ्यांच्या शारीरिक विकासालाही प्रोत्साहन दिले जाते.
विद्यार्थ्यांच्या सर्वांगीण विकासासोबतच त्यांच्या आरोग्याचीही विशेष काळजी घेतली जाते. शाळेमार्फत दर महिन्याला विविध आरोग्य शिबिरांचे आयोजन करण्यात येते. यामध्ये नेत्रतपासणी, दंततपासणी, शारीरिक आरोग्य तपासणी तसेच विद्यार्थ्यांच्या आरोग्यविषयक समस्यांबाबत तज्ज्ञ डॉक्टरांकडून मार्गदर्शन केले जाते. त्यामुळे विद्यार्थ्यांमध्ये आरोग्याबाबत जागरूकता निर्माण होण्यास मदत होते. तसेच विद्यार्थ्यांच्या प्रगतीसाठी दर महिन्याला पालक मेळाव्याचे आयोजन करण्यात येते. यात विद्यार्थ्यांच्या शैक्षणिक प्रगतीचा आढावा घेऊन पालकांशी संवाद साधला जातो.
विद्यार्थ्यांना प्रत्यक्ष अनुभवातून ज्ञान मिळावे यासाठी शैक्षणिक सहलींचे आयोजन केले जाते. उदगीर किल्ला, पोस्ट ऑफिस, पोलीस स्टेशन, शासकीय रुग्णालय, साईधाम, रेल्वे स्टेशन, बौद्ध विहार, राजराजेश्वरी मंदिर तसेच प्रगत शेतांना भेटी देऊन विद्यार्थ्यांना प्रत्यक्ष ज्ञान दिले जाते.
शाळेतील विविध कार्यक्रमांना माजी नगराध्यक्ष सुधीरभाऊ भोसले, सत्यवान बोरोळकर, डॉ. विद्यासागर अचोले, डॉ. बालाजी बिरादार, शहाजी पाटील तळेगावकर, डॉ. दत्तात्रय इनामदार, डॉ. अयुब पठाण, डॉ. माधुरी शेळके, ब्युटीशियन व न्यूट्रिशियन तज्ञ मोहिनी अचोले, सह्याद्री इंटरनॅशनल ज्युनिअर कॉलेज अहिल्यानगरचे संचालक सचिदानंद घोणसे, डॉ. उमेश लहाने, डॉ. विठ्ठल चामवाड, डॉ. सुनील माने डॉ. पंकज मुंडे यांच्यासह अनेक मान्यवर व शिक्षण विभागातील अधिकाऱ्यांनी भेट देऊन विद्यार्थ्यांचे व शाळेच्या कार्याचे कौतुक केले आहे.
संचालक दीपक पाटील नेत्रगावे व सौ. संगीता नेत्रगावे यांच्या मार्गदर्शनाखाली प्राचार्य आनंद चिंचोले तसेच स्वाती चिंचोले, प्रदेवी वाडीकर, रेचल सूर्यवंशी, सुचिता पाटील, शिवकन्या वाघमारे, दिक्षा कांबळे आणि इतर कर्मचारी शाळेच्या प्रगतीसाठी सातत्याने कार्यरत आहेत.
भविष्यात जकनाळ येथे ‘सह्याद्री स्कूल अँड ज्युनिअर कॉलेज’च्या माध्यमातून इयत्ता पहिली ते बारावीपर्यंतचे आधुनिक शैक्षणिक संकुल उभारण्याचा संस्थेचा मानस आहे.
महात्मा पब्लिक स्कूलने अल्पावधीत केलेली उल्लेखनीय प्रगती पाहता आगामी काळातही ही संस्था शिक्षण क्षेत्रात नवे मानदंड प्रस्थापित करेल, असा विश्वास व्यक्त केला जात आहे.
— शंकर बोईनवाड
पत्रकार, उदगीर
टिप्पण्या
टिप्पणी पोस्ट करा