------------------------------------
आपल्या वडिलांच्या संस्कारातून वाढलेले, प्रामाणिकपणे सेवा बजावणारे उपक्रमशील आदर्श शिक्षक श्री.सुनील कलूरकर यांचा थोडक्यात परिचय करून देणारा हा लेख खास शिक्षक दिनानिमित्त....
श्री.सुनील तुकाराम कल्लूरकर यांचा जन्म दि.१२ ऑगस्ट १९७८ रोजी कल्लूर ता.उदगीर जि.लातूर येथे एका सुशिक्षित कुटुंबात झाला. वडील शिक्षक असल्यामुळे श्री.सुनील कल्लूरकर यांना शिक्षणाची कसलीच अडचण भासली नाही.त्यांचे प्राथमिक शिक्षण जि.प.प्रा.शाळा कल्लूर, माध्यमिक शिक्षण समर्थ विद्यालय एकुरका (रोड) ता.उदगीर येथे झाले. उच्च माध्यमिक ते पदवी पर्यंतचे शिक्षण शिवाजी महाविद्यालय उदगीर, पदव्युत्तर शिक्षण महाराष्ट्र उदयगिरी महाविद्यालय उदगीर येथे झाले. अध्यापन पदवीचे शिक्षण पिलेज कॉलेज ऑफ एज्युकेशन अँड रिसर्च सेंटर चेंबूर नाका, मुंबई येथे झाले.शिक्षण संपल्यावर श्री. सुनील कल्लूरकर हे दि.१० जून २००२ रोजी उदगीर येथील साने गुरुजी माध्यमिक विद्यालय उदगीर येथे माध्यमिक शिक्षक म्हणून रुजू झाले. कायम विनाअनुदानित तत्वावर चालणाऱ्या या माध्यमिक विद्यालयात श्री.कल्लूरकर यांनी प्रामाणिक व तळमळीने अध्यापनाचे कार्य केले. वडील श्री.टी. एस.कल्लूरकर हे शिक्षक ते गटविकास अधिकारी म्हणून सेवा बजावत शिक्षणासारख्या पवित्र क्षेत्रात भरीव असे कार्य केले.त्यांच्या संस्कारात, त्यांच्या मार्गदर्शनाखाली श्री.सुनील कल्लूरकर हे सेवा बजावताना दिसतात.
श्री.कल्लूरकर हे या शाळेत जवळपास १५ वर्षे परीक्षा विभाग प्रमुख म्हणून कार्य केले. सध्या ते प्रसिध्दी विभागात कार्यरत आहेत. या शाळेचा निकाल दरवर्षी चांगला लागतो.ते आठवी ते दहावी वर्गाला मराठी व इतिहास हा विषय शिकवितात.त्यांच्या विषयाचा निकालही १००% लागतो.शैक्षणिक गुणवतेत ही शाळा आघाडीवर आहे. श्री.कल्लूरकर हे या शाळेत साजऱ्या होणाऱ्या महापुरुषांच्या जयंती-पुण्यतिथी निमित्त विविध कार्यक्रमांचे आयोजन करतात.वक्तृत्व, गायन, वेशभूषा अशा अनेक कार्यक्रमात ते विद्यार्थी घडविण्याचा प्रयत्न करीत असतात. सण - वारा निमित्त शाळेत कार्यक्रमाचे आयोजन करून सणावाराची माहिती विदयार्थ्यांना देत असतात.सर्व राष्ट्रीय कार्यक्रमात त्यांचा सहभाग महत्वाचा असतो.विषय शिक्षकांच्या तालुकास्तरीय अनेक शिबिरात त्यांनी सहभाग नोंदवला.बी.एल.ओ. म्हणूनही त्यांनी अडीच वर्ष सेवा बजावली.कोरोना काळातही त्यांनी लोकांसाठी भरीव असे कार्य केले.साने गुरुजी विद्यालयात आयोजीत जिल्हास्तरीय विज्ञान प्रदर्शनात त्यांचा महत्वाचा सहभाग होता. श्री.सुनील कल्लूरकर यांच्या यांच्या शैक्षणिक कार्याची नोंद घेवून त्यांना अनेक सन्मान प्राप्त झाले. डॉ. राममनोहर लोहिया जन्मशताब्दी निमित्त राष्ट्रसेवादल उदगीर तर्फे दि. २ जानेवारी २०१० रोजी आयोजीत एकदिवसीय प्रशिक्षण शिबिरात सहभागी झाल्याबद्दल प्रमाणपत्र देण्यात आले.एस.एम.जोशी जन्मशताब्दी समितीद्वारा नळदुर्ग येथे आयोजीत पथनाट्य प्रशिक्षण शिबिरात सहभागी झाल्याबद्दल प्रशस्तीपत्र प्रदान , कै.विलास भोसले मित्रमंडळ उदगीरच्या वतीने आदर्श शिक्षक पुरस्कार, दि लातूर क्लब द्वारा आयोजीत लातूर फेस्टिव्हल २०११ निमित्त आयोजीत जिल्हास्तरीय चित्रकला स्पर्धेत विद्यार्थी सहभागी केल्याबद्दल प्रशस्तीपत्र प्रदान, अंनिस आणि विज्ञान व तंत्रज्ञान मंत्रालय भारत सरकार संचलित विज्ञान बोध वाहिनी प्रकल्प अंतर्गत प्रशस्तीपत्र प्रदान, स्वप्नपूर्ती कला अकॅडमी लातूरच्या वतीने जिल्हास्तरीय भव्य रंगभरण स्पर्धा २००३- ४ मध्ये जास्तीतजास्त विद्यार्थी सहभागी केल्याबद्दल प्रशस्तीपत्र प्रदान, लायन्स व लिओ क्लब उदगीरच्या वतीने आदर्श शिक्षक पुरस्कार प्रदान करण्यात आला.2023 मध्ये समृद्धी प्रकाशन हिंगोलीच्या वतीने स्व. मारोतराव कऱ्हाळे राष्ट्रीय आदर्श शिक्षक पुरस्कार, 2026 मध्ये लोककला, कलावंत साहित्य परिषद श्रीरामपूर जि. अहिल्यानगर चा राज्यस्तरीय आदर्श शिक्षक पुरस्कार त्यांना प्राप्त झाले आहेत.श्री.कल्लूरकर यांनी आतापर्यंत वेगवेगळ्या विषयांवर १०० पेक्षा जास्त लेख लिहिले असून अनेक लेखाना नामवंत दैनिकात प्रसिद्धीही मिळाली.
जीवनात आई-वडील व सर्व कुटुंब, शिक्षक सुभाष पेदावार, एस.टी. बिरादार, प्रा.साली युनास, प्रा निमिषा गुंजकर यांना आदर्श मानणाऱ्या श्री.सुनील कल्लूरकर यांना भविष्यात पुस्तक निर्मिती करायची आहे.ग्रामीण भागात वाचन संस्कृती रुजवण्यासाठी कल्लूर येथे सार्वजनिक वाचनालय सुरू करण्याचा त्यांचा मानस आहे. आज शिक्षक दिन त्यानिमित्त त्यांना शुभेच्छा देवूया !
*शंकर बोईनवाड*
संपादक, उदगीर
टिप्पण्या
टिप्पणी पोस्ट करा