----------------------
*देवणी*: तालुक्यातील बोरोळ जिल्हा परिषद गटाची निवडणूक यंदा केवळ पक्षीय गणितांवर नाही, तर भाजपाच्या विकासाच्या राजकारणावर केंद्रित झाल्याचे चित्र स्पष्टपणे दिसत आहे. केंद्रात, राज्यात आणि जिल्ह्यात सत्तेत असलेल्या भारतीय जनता पक्षाने मांडलेली “सबका साथ, सबका विकास” ही भूमिका बोरोळ गटात प्रत्यक्षात उतरवणारे नाव म्हणून आज धोंडाराज (राज) किशनराव गुणाले यांच्याकडे पाहिले जात आहे.
भाजपाचे निष्ठावंत कार्यकर्ते म्हणून ओळख असलेल्या धोंडाराज गुणाले यांनी राजकारणात घोषणा कमी आणि काम अधिक या तत्वावर वाटचाल केली. नागतीर्थवाडी गावात उपसरपंच म्हणून काम करताना त्यांनी भाजपाच्या ग्रामविकास, स्वच्छता, डिजिटल इंडिया आणि शिक्षण या धोरणांना गावपातळीवर प्रत्यक्ष स्वरूप दिले. त्यामुळेच आज नागतीर्थवाडी हे गाव केवळ विकासाचे उदाहरण नसून भाजपाच्या विचारधारेचा मॉडेल ग्रामपंचायत नमुना म्हणून ओळखले जाते.
देवणी तालुक्यातील सर्वप्रथम निर्मलग्राम म्हणून ओळख मिळवलेले नागतीर्थवाडी हे गाव भाजपाच्या स्वच्छ भारत अभियानाच्या विचारांना सुरुवातीपासून अंगीकारणारे गाव ठरले. राष्ट्रपती ए.पी.जे. अब्दुल कलाम यांच्या हस्ते मिळालेला निर्मलग्राम पुरस्कार, महात्मा गांधी तंटामुक्त गाव पुरस्कार, संत गाडगे बाबा ग्राम स्वच्छता अभियानातील यश, स्मार्ट व्हिलेज स्पर्धेतील प्रथम क्रमांक — हे सर्व पुरस्कार म्हणजे केवळ सन्मान नसून भाजपाच्या विकासाभिमुख धोरणांची प्रशासकीय मान्यता आहे.
भाजपाने देशभरात राबवलेल्या डिजिटल इंडिया संकल्पनेची खरी अंमलबजावणी नागतीर्थवाडीत दिसते, असे अनेक प्रशासकीय अधिकारी व लोकप्रतिनिधी मान्य करतात. संपूर्ण गावात मोफत Wi-Fi सुविधा उपलब्ध करून देणारे मराठवाड्यातील पहिले गाव म्हणून नागतीर्थवाडीची ओळख निर्माण झाली. ग्रामपंचायतच्या नियंत्रणाखाली प्रत्येक लाईट पोलवर बसवलेली स्पीकर यंत्रणा, सायंकाळी सात वाजताचे बातमीपत्र, राष्ट्रगीत, जनजागृती संदेश, कोविड काळातील सूचना — हे सर्व उपक्रम भाजपाच्या शिस्तबद्ध प्रशासनाचा स्थानिक स्तरावरचा प्रत्यय देतात.
शिक्षणाच्या बाबतीतही भाजपाच्या “नवीन भारत – सशक्त शिक्षण” या संकल्पनेला अनुसरून धोंडाराज गुणाले यांनी काम केले. जिल्हा परिषद शाळेतील विद्यार्थ्यांना दर्जेदार गणवेश, विद्यार्थ्यांच्या नावासह व जिल्हा परिषद लोगो असलेल्या शालेय बॅगा, संगणक व प्रोजेक्टरद्वारे डिजिटल शिक्षण, शाळेतील पायाभूत सुविधा मजबूत करणे — या सगळ्या बाबी निवडणुकीच्या तोंडावर नव्हे, तर सातत्याने केल्या गेल्या. त्यामुळेच नागतीर्थवाडीची शाळा तालुक्यात आदर्श म्हणून ओळखली जाते.
भाजपाचे नेतृत्व म्हणजे केवळ सत्तेचा लाभ घेणे नव्हे, तर तो लाभ सामान्य माणसापर्यंत पोहोचवणे, हे धोंडाराज गुणाले यांच्या कामातून दिसते. साधाभोळा कार्यकर्ता, कार्यकर्त्यांमध्ये मिसळणारा नेता, कोणत्याही गावातून आलेल्या हाकेला धावून जाणारे व्यक्तिमत्त्व — हीच त्यांची ओळख आज बोरोळ गटात भाजपासाठी ताकद ठरत आहे. त्यामुळेच भाजपाचे स्थानिक कार्यकर्ते, बूथ प्रमुख, युवक व महिला संघटना यांच्यात त्यांच्या उमेदवारीबाबत उत्साह दिसून येतो.
नागतीर्थवाडीला मिळालेले लोकमत सरपंच अवॉर्ड, स्मार्ट व्हिलेज पुरस्कार, मुख्यमंत्री माझी शाळा सुंदर शाळा अभियानातील यश, पंचायत लर्निंग सेंटरसाठी जिल्ह्यातून निवड — ही सर्व यशोगाथा भाजपाच्या सत्तेचा योग्य वापर करून गावविकास साधल्याचे उदाहरण मानली जात आहे. त्यामुळे “भाजपाची सत्ता असताना काय फरक पडतो?” या प्रश्नाचे उत्तर नागतीर्थवाडी देत आहे, अशी चर्चा मतदारांमध्ये सुरू आहे.
आज बोरोळ जिल्हा परिषद गटात फिरताना एक बाब प्रकर्षाने जाणवते — ही निवडणूक केवळ उमेदवारांची नाही, तर भाजपाच्या विकासाच्या विश्वासाची आहे. विरोधकांकडे टीका आहे, पण कामांची ठोस उदाहरणे नाहीत, अशी चर्चा मतदारांमध्ये आहे. याउलट भाजपाचे उमेदवार धोंडाराज गुणाले यांच्याकडे नागतीर्थवाडीच्या विकासाचे प्रत्यक्ष पुरावे, पुरस्कार आणि लोकांचा अनुभव आहे.
केंद्रात पंतप्रधान नरेंद्र मोदी, राज्यात भाजपाचे नेतृत्व आणि जिल्ह्यात भाजपाची ताकद या सगळ्यांचा उपयोग करून बोरोळ गटाचा नव्हे, तर संपूर्ण देवणी तालुक्याचा विकास खेचून आणण्याचा निर्धार धोंडाराज गुणाले व्यक्त करत आहेत. त्यामुळेच बोरोळ गटात त्यांना मिळणारा प्रतिसाद हा केवळ व्यक्तीला मिळणारा नाही, तर भाजपाच्या काम करणाऱ्या नेतृत्वावर मतदारांनी दाखवलेला विश्वास असल्याचे स्पष्टपणे दिसत आहे
*दयानंद कांबळे नागराळकर*
टिप्पण्या
टिप्पणी पोस्ट करा